KALIBO, Aklan — Maga-arangkada eon ro public consultation it Metro Kalibo Water District angot sa petisyon nga pagpataas sa panueuktan it tubi.
Suno kay Frederick Buenavidez, Division Manager V it Water Resources Division ag tagapaghambae it MKWD nga target nanda nga magpatuman it dugang nga panueuktan, apang nagpamalibad anay nga magtau it ensaktong kantidad ag sa baylo hay igaplastar nanda sa public hearing.
Sa makaron ro andang panueuktan hay P20.50 per cubic meter ukon may minimum rate kada “10 cubic meter” nga P230.
Ro existing sigon nanda nga water rate hay aprubado kato pang dag-on 2002 ag napatuman ko 2011.
Hin-aga nga adlaw it Miyerkules, Disyembre 3 hay pagahiwaton ro public consultation sa Kalibo Pastrana Park, sa Disyembre 4 sa Teodosio’s Park sa Banga, sa Disyembre 5 it agahon hay sa New Washington ag sa hapon hay sa Balete gymnasium.
Gin-insister ni Buenavidez nga tuyo it public hearing nga maplastar ro mga kinahangean nga proyekto it MKWD para mas mapamayad pa ro serbisyo sa mga konsumidor.
Ginaboeobanta 100 nga mga proyekto ro kinahangean nanda nga mapatuman eakip ro pagdugang it mga sources, pagpabahoe ag pagbaylo it mga linya.
Gin klaru dugang it nasambit nga water concessionaire nga ro public hearing angot sa petisyon nga water rate increase hay kaparte eamang it proseso, apang nakadepende raya sa pag apruba it Local Water Utilities Administration.
Samtang, gusto sigon it MKWD nga mapatuman ro increase sa 2027, apang nakadepende pa raya sa proseso bangud nga sa makaron hay masobra sa 200 nga mga local water districts ro may naka pending nga local water rates approval.
