Padayun nga nagatau it inspirasyon sa nagkaeain-eain nga henerasyon ro istorya sa pagtukod it Aklan.
Suno kay Atty. Plaridel Morania, sangka batikang abogado sa Aklan nga raya hay nagapadumdum nga pinaagi sa tingub nga pagpati ag pagtinguha hay makasarang nga magbilog it sangka manami nga puturo para sa mga pumueuyu ag sa banwa.
Sa sueod suno kana it pitong dekada, nagapabilin nga buyot it Aklan ro bugana nga kultura, mabakod nga pamana, ag indi matupungan nga kasikatan it mga Aklanon.
Dugang pa nga ro selebrasyon it Aklan Day hay owa eamang nagatau it pasidungog sa nagtaliwan, kundi pati man sa mga tawo, istorya, ag tradisyon nga padayun nga nagabilog sa anang pagkatawo.
Halin suno kana sa makolor nga selebrasyon ag mga destinasyong ginakilaea sa bilog nga kalibutan hasta sa pagiging creative it mga local artist, ro nasambit nga importanteng parte hay sangka selebrasyon it kun sin-o kita ag kun ano eon ro atong naabot.
Nauna kara, nagpahaum ro provincial government it Aklan it sang buean nga mga nagkaeain-eain nga aktibidad para sa ika-70 nga Aklan Day makaron nga dag-on.
Ro Abril 25 kada dag-on hay ginadeklara bilang “Aklan Day” sa gahum it Republic Act No. 1414 nga ginpirmahan kato ni Pangueong Ramon Magsaysay ko Abril 25, 1956.
Kaina it agahon hay nakaangkon it misa it pagpasaeamat sa St. John the Baptist Cathedral, nga ginsundan it civic ag military parade halin sa Kalibo Pastrana Park hasta sa Godofredo P. Ramos Park, pag-haead it bueak ag seremonya it pag-lasa it bandera.
Ro Abril 25 hay sangka special non-working holiday sa probinsiya agud nga taw-an it daean ro komunidad nga iselebrar ro event.
Si Congressman Godofredo Peralta Ramos, nga ginakilaeang Ama it Aklan, ro nagdihon it House Bill No. 334 agud nga iseparar ro Aklan halin sa probinsiya it Capiz ko Enero 1954.
Raya hay ginpasa sa Senado nga owa it amyenda ko Abril 16, 1956, ag ginpirmahan bilang laye ko Abril 25, 1956.
