REGIONAL News — Patay ro sangka pulis matapos aksidenteng mahueog sa irigasyon ro anang ginamaneho nga motorsiklo sa national highway nga sakop it Bago City, Negros Occidental.
Nakilaea ro biktimang si Police Staff Sgt. Hero John Trayco, 36, intelligence officer it Bago City Police Station, may-asawa ag residente it Purok Quarry Site, Barangay Napoles, Bago City.
Base sa report it Bago City-PNP, bandang 4:00 it aga-aga hay nakit-an ro nakakueob nga bangkay it biktima it mga nagarondang tanod sa may irigasyon sa Purok San Pedro, Barangay Napoles, it nasambit nga siyudad.
Ginpahayag nga antes ro insidente hay nagpatigayon si Trayco it covert operations bandang 11:51 it gabi-i.
Gulpi eamang sigon nga nag-eain ro pamatyag ni Trayco rason nga nagpa rekord raya sa anang kaibahan nga maga-uli anay bangud sa bukon it manami nga pamatyagan.
Nag-uli ro biktima sakay it anang motorsiklo, apang antes pa man nga nagbut-eak ro adlaw hay nakit-an raya nga naga-eutaw-eutaw sa irigasyon.
Rumesponde man ro mga otoridad sa lugar it gin-eontaran it insidente ag gindaea sa ospital ro biktima apang gindeklara eon raya nga patay it nagtatap nga doktor.
Nagatuhaw sa imbestigasyon it kapulisan nga posibleng owa nasarangan it biktima ro ginabatyag rason nga naduea-an it kontrol sa manibela ag naeumos sa irigasyon nga naging rason it anang kamatayon.
Owa man it nakikitang foul play sa nasambit nga insidente ag nakit-an sa anang kilid ro service firearm ag mga personal nga gamit.
Nagapati man ro pamilya nga aksidente ro natabu sa biktima nga may ginabatyag nga sakit nga hypertension.
