KALIBO, Aklan — Sa tunga it imbestigasyon sa mga flood control projects it gobyerno, owa it nakikita nga problema ro barangay council sa nagapadayun nga construction it revetment wall sa daywang ka sitio sa Brgy. Tambak, New Washington.
Suno kay Punong Barangay Alex Villaruel it nasambit nga lugar nga ro on-going nga construction it revetment wall sa Sitio Saugan ag Sitio Dumlog hay sa idaeum it termino ni Pangueong Ferdinand Marcos Jr.
Sa pihak kara, owa imaw it ideya angot sa iba pang detalye it proyekto bangud nga owa nana nakita ro program of works ag owa man it natabu nga formal turn-over it mga dokumento sa pag-umpisa it anang termino.
Aminado si Kapitan Villaruel nga importante para kanda ro revetment wall bilang proteksyon sa andang kabuhi ag pangabuhian kontra sa baha ag paghugos it eugta.
Sa pihak nga parte, ginklaru man nana nga ro mga nagkaeasamad nga flood control projects sa andang lugar partikular ro revetment wall hay proyekto it DPWH sa idaeum it termino ni Pangueong Rodrigo Duterte, kun sa siin haeos daywang dag-on pa eamang nga natapos hay naeumpag eon ro pilang portion kara.
Sa makaron hay sigidas sigon ro andang follow-up kara sa ahensiya agud nga mataw-an it pondo para sa hinyu nga reconstruction.
Nauna eon nga nagpahayag it pagkadismaya ro mga apektadong residente bangud nga mag-eowas nga nabutang sa peligro ro andang pangabuhian hay apektado man ro andang propiyedad ag kabuhi.
