KALIBO, Aklan—Pabor si sangguniang bayan member Agosto Tolentino sa ginaduso makaron sa manabang kapueungan it kongreso nga makaangkon it lifetime validity ro identification cards ukon IDs it mga persons with disabilities ukon PWD nga gina-isyu sa mga tawo nga may kapansanan.
Kaabuan suno kana sa mga PWD hay ro andang mga pamilya ro naga-renew it andang mga IDs nga kon amat hay may ginasukot pa nga baeayran.
Sa makaron hay obligado sanda nga i-renew ro andang mga IDs kada tatlong dag-on para sa re-evaluation kon nagakabagay pa sanda sa mga benepisyo nga ginabaton angot sa andang disability status.
Ro pag-renew suno kana it IDs hay dugang nga kalisod sa mga indibidwal nga may total permanent disability.
Tuyo it hagna nga magtau it kasoehayan sa mga PWDs nga may permanent disabilities kapareho it pre-existing birth defects, mga bulag, bungoe ukon mga pakaw ag paki.
Ro nasambit nga hagna suno kana hay bilang pagkilaea man sa importanteng kontribusyon it mga indibidwal nga may kapansanan ag ro eubusan nga pagbaton kanda it sosyudad.
Paga-amyendahan kara ro pilang importanteng probisyon it Republic Act 7277 ukon Magna Carta for Disabled Persons.
Ro pag-isyu it PWD cards nga may lifetime validity para sa persons with permanent disabilities hay kinahangean nga masertipikahan it Municipal ukon City Health Office kun sa siin naga-istar ro PWD.
Nasayuran nga kon ano ro ginabaton nga benepisyo it mga senior citizens hay kapareho man sa PWD.
