Nagapati si Atty Harry Sucgang, sangka political analyst at dating provincial board member it Aklan nga gintun-an it husto it House Quad Committee ro andang rekomendasyon nga pasakaan it kasong “crimes against humanity” si dating Pangueong Rodrigo Duterte, kaibahan sanday Sen. Ronald “Bato” de la Rosa, dating PNP Chiefs ret. Oscar Albayalde ag ret. Gen. Debold Sinas; dating P/Colonels Royina Garma ag Edilberto Leonardo ag dating Palace aide nga si Herminia “Muking” Espino.
Suno kay Atty Sucgang nga posibleng sa ginpatigayon nga mga hearings ag pag imbestiga hay nakitaan it probable cause agud nga pasakaan sanda it kaso.
Natukiban sigon sa mga pagpamati it Quad Comm ro Davao model ukon reward sa mga opisyal ag tawuhan it pulisya nga makapatay it mga drug personalities, pag-eksister it Davao Death Squad, pagpatay sa tatlong Chinese drug lords sa sueod it Davao Penal Colony ag iba pa.
Nasayuran nga ro rekomendasyon hay nakabaehag sa 43 panig nga QuadCom progress report matapos ro 13 nga hearings umpisa Agosto 16 hasta Disyembre 12, 2024 kun sa siin gin-presentar nanda ro mga nadiskubrehan, natipon nga ebidensya, naging aksyon ag rekomendasyon sa paghimo it proposed bill angot sa EJK, illegal nga droga kamana man ro illegal nga operasyon it POGOs.
