KALIBO, Aklan – Nag-abot eun ro pilang materyales para sa paghimo it habilin nga mga stalls.
Pahayag ni Noe Pador ro Market Supervisor it Kalibo Public Market nga basi sigon sa sueod it daywa hasta tatlong dominggo hay matapos eun ro nasambitan nga mga stalls agud sigon makahalin eun ro mga vendors sa andang relocation site.
Unahon man it halin ro mga meat and fish vendors ngani ayuson ag obserbahan man sigon ro mayad nga pamaagi ukon klase it sectioning.
Base man sigon sa mga contractor nga hueaton anay nanda nga makahalin ro tanan nga vendors sa relocation site antes nga raya hay mag-umpisa it trabaho.
Dugang pa ni Pador nga raya hay maumpisahan gid bangud nga haabot eun man ro tig-ouean.
May mga CCTVs eun man para sa seguridad, maayos man ro mga pasilidad kapareho it comfort rooms, ag nakikipagkooperar eun man ro mga vendors sa Akelco para sa andang kuryente.
Halin sigon karun hay uwa eun sanda it gastuson ag sabat eun man it LGU Kalibo ro mga wiring ag iba pa.
Samtang, mahina sigon ro numero it mga nagarenew it permit bangud sigon sa mga isyu kapareho it bag-ong private market kun siin nga para kana hay mataas ro rate it raya kesa sa ana it public market.
Mahimo man sigon magbisita sa relocation ag ipaabot kana ro mga suhestiyon ukon ibang problema.
Paniguro ni Pador nga indi sigon magkabaeaka bangud nga ginahimo it LGU Kalibo ro mga aksyon agud mangin komportable sanda sa andang halinan.
