KALIBO, Aklan—Ginkalipay nga ipahayag it Aklan Provincial Government nga madayon eon ro ginahandom nga road construction maghalin sa Brgy. Poblacion hasta it Brgy. Panipiason, Madalag ag ro pagpaobra it tulay sa nasambit nga lugar.
Suno kay Engr. Roger Esto it provincial and planning office nga sa pagtinguha it gobyerno probinsyal hay ginpondohan raya it World Bank it kapin sa P620 milyon kon sa siin kapin sa 10 percent eamang ro counterpart it Aklan provincial government.
Engkaso nga matabo eon ro nasambit nga proyekto hay mabahoe raya nga bulig sa ekonomiya it probinsya bangud sa madali eon lang ro pagpapanaog it mga produkto maghalin sa nasambit nga baryo hasta sa banwa paadto sa Kalibo nga sentro it komersyo it probinsya it Aklan.
Ro konsepto hay halin sa farm to market road program it Department of Agriculture kon sa siin kinahang-ean ro mga mabukid ag maeayo nga lugar hay kinahang-ean nga may accessible nga daean para madasig nga maitransport ro andang mga nagkaeain-eain nga produkto maghalin sa andang pangabuhian.
Mag-eowas kara, ginpahayag dugang ni Engr. Esto nga maabong tinagong manggad ro Brgy. Panipiason karaprehas it falls ag mga kasubaan nga patok sa mga turismo.
