KALIBO, Aklan — Maswerteng nakaeowas ro sangka manugturo matapos nga gulpi eamang nga nagdaba-daba ro ginamanehong saeakyan samtang nga nagadaeagan sa kahabaon it barangay road it Brgy. Tigayon, Kalibo.
Suno kay FO3 Joseph Dapitillo it Bureau of Fire Protection (BFP)-Kalibo, base sa andang inisyal nga imbestigasyon, natabu ro insidente samtang nga ginamaneho it tag-ana nga si Cicero Reyes ro anang kulay itom nga Mitsubishi Adventure nga may plate number nga WP-559 nga medyu may kalumaan eon.
Halin sigon raya sa andang baeay ag paagto eon kunta sa sangka pribadong eskwelahan, apag pag-abot sa nasambit nga lugar hay gulpi eon lang nga nag-asu ro unahan nga parte it saeakyan hasta nga ko ulihi hay nagkaeayo.
Insigidang nagguwa sa anang saeakyan ro tag-ana ag gintinguhaan nga patyon ro kaeayo.
Apang sa pag-responde eon it mga bumbero raya eubusan nga natapna.
Samtang, ginatantiya nga P200,000 ro danyos sa insidente ag ginasugid nga short circuit ro ginhalinan it sunog.
