KALIBO, Aklan—Mabahoe nga perwisyo sa mga residente ag naga-agi nga motorista ro mga potholes sa daeanon nga sakop it Brgy. Ugsod, Banga.
Suno sa sangka concerned citizen, mabuhay eon nga samad ukon eubak-eubak ro nasambitan nga karsada ag hasta makaron hay owa gihapon naaksyonan.
Nag-apela man raya sa mga natungdan nga maghimo eon it aksyon.
Nagiging mabudlay man suno kana ro transportasyon ag pagbiyahe bangud sa mga potholes.
Dati sigon nga sementado ro karsada apang bangud sa kabuhayon eon ag sigidas nga pag-agi it mga mabahoe nga saeakyan it mga quarry site operator hay mas pa rayang nasamad.
Samtang, ginpaathag ni Punong Barangay Vicente Ibesate Sr. it Brgy. Ugsod, Banga nga naka-istorya eon sanda it mga kapitanes it Brgy. Bacan, Cerrudo ag Cupang para masolusyonan ro problema sa andang provincial road.
Suno kana nagbaeay sanda it sangka joint resolution nga igapadaea sa taeatapan ni Aklan Governor Florencio Miraflores.
Naga-eauman man imaw nga daeayon eon rayang maaksyonan it gobyerno probinsyal.
Sa makaron hay nagataeana sanda it tatlong kamanyero nga nagatambak it baeas sa karsada kada buean nga ginabayaran nanda it tig 2,000 pesos bilang temporaryong solusyon.
Ro mga baeas sigon nga ginagamit nanda sa pagtambak hay ginapangayo man nanda sa mga concessionaire.
Aminado man ro opisyal nga indi masarangan it barangay nga sabton ro gaeastuson sa pagpaayos it natungdan nga karsada.
