KALIBO, Aklan—Naga abot eon sa masobra sa sang milyong turista nga parehong local ag foreign ro nagbakasyon sa Isla it Boracay sa nagtaliwan nga an-um nga buean it makaron nga dag-on.
Suno kay Felix delos Santos, head it Malay Municipal Tourism Office, nakalista sanda it kabilugan nga 1,141,810 nga tourist arrivals umpisa Enero hasta Hunyo 2023.
Dugang pa kara nga ro South Korea ro nagapabilin nga top market sa foreign arrivals sa Boracay nga may una nga 87,750; ginsundan it USA nga may 21,273; China sa 12,163; Taiwan sa 10,822, kamana man nga nakasueod sa top 10 ro Austria, United Kingdom, Russia, Germany, Canada ag Japan.
Bago pa nakaangkon it COVID-19 pandemic ro South Korea eon ro largest market it Boracay para sa foreign arrivals.
Nasayuran nga mag-eowas sa Korea ag Taiwan, nakaangkon man it mga direct flights halin sa China sa Kalibo International Airport.
Sa pihak nga parte, ginpahayag ni delos Santos nga maskin nga 1.8 million ro target nga tourist arrivals makaron nga 2023, mabahoe ro andang pagpati nga maga-abot raya sa 2 million bangud sa paghaeuga it mga travel restrictions sa pilang mga nasyon sa Asya.
