KALIBO, Aklan—Nagtingob eon it pwersa ro Sangguniang Bayan it Malay ag daywang ka grupo it mga negosyante sa Boracay para sa gina-hirit nga makaangkon it separadong quarantine classification ro isla.
Raya hay kasunod it sueat ni Tourism Secretary Bernadette Romulo-Puyat kay Malay mayor Frolibar Bautista nga bantayan it husto ro Boracay nga indi masudlan it maskin anuman nga variant it COVID-19.
Suno kay Malay Sangguniang Bayan member ag Committee on Tourism Chair Nenette Aguirre-Graf nga nagakabaeaka sanda nga eubusan nga mag-collapse ro industriya it turismo sa isla bangud sa presenteng sitwasyun.
Nagdihon eon sigon sanda it resolusyon sa konseho kamana man nga nagpadaea it sueat ro Boracay Foundation Inc. ag Philippine Chamber of Commerce and Industry-Boracay Chapter kay Aklan Gov. Florencio Miraflores agud nga taw-an it otoridad si Mayor Bautista nga magpaguwa it kaugalingon nga executive order angot sa andang magiging quarantine status.
Kinahangean suno kana nga dere-deretso ro operasyon it andang negosyo agud nga makabangon ro lokal nga ekonomiya ag indi maduea-an it trabaho ro andang mga obrero.
Mag-eowas kara, kontrolado man sigon it LGU-Malay ro mga kaso it COVID-19 sa Boracay ag mainland Malay mag-eowas pa nga mataas eon man ro numero it mga nabakunahan idtu nga mga residente ag mga trabahador.// sa makaron hay ginahueat eon lang sigon nanda ro desisyon angot kara ni Governor Miraflores.
Magka-iba suno kana ro sitwasyun sa isla kumpara sa iba pa nga banwa it aklan, kun sa siin madali nga ma-monitor ro implementasyon it health and safety protocols ag ro hueag it mga tawo.
Nasayuran nga extended pa ro Modified Enhanced Community Quarantine (MECQ) sa Aklan hasta sa Setyembre 7 nga nag-umpisa ko Agosto 1.
