Hugut nga ginkundina ni Sangguniang Bayan Member Augusto Tolentino ag dating media practitioner sa probinsiya it Aklan ro natabu nga pagbaril-patay sa beteranong radio broadcaster sa Calamba, Misamis Occidental nga si Juan Jumalon, 57 anyos nga mas kilaea man bilang si ” DJ Johnny Walker ” it Gold FM 94.7 Calamba.
Suno kana nga bukon it madali ro pagiging broadcaster bangud nga mahimo nga abong matamaan sa mga ginahimo nanda nga komentaryo.
Ginhalimbawa nana ro natabo sa anang amigo nga si Boy Hinolan nga dating manager it Bombo Radyo Kalibo.
Padumdom nana sa mga radio broadcaster nga kung makabaton it threat hay indi sigon pagbalewalaon ag kinahangean ro dobleng pagdahan ag likawan nga magguwa eabi eun kung gabei.
Ginpaathag pa it opisyal nga bukon it sa tanan nga oras hay magustuhan it mga tawo ro radio broadcaster eabi eun ro mga nagapatigayon it hard hitting commentaries.
Ginpabutyag man nana nga bukon it kabaton-baton ro pagbaril ag pagpatay sa radio broadcaster sa Misamis Occidental.
