KALIBO, Aklan—Matapos nga aprubahan sa ikatlo ag ulihing pagbasa it manabang kapueongan it kongreso ro kontrobersyal nga ng Boracay Island Development Authority (BIDA) bill sa idaeom it Government-owned and controlled corporation (GOCC), naghimo man it sangka draft resolution ro Sangguniang Panlalawigan it Aklan para ikonsidera ro andang apela sa Senado.
Nasayuran nga nakataeana eon nga pagatalakayon it mga mamalidha ro House Bill 9826 ukon ro proposisyong BIDA Act.
Suno kay Sangguniang Panlalawigan member Esel Flores nga nagaeaum sanda nga mapamatian it Senado ro apela it lokal nga gobyerno it Aklan, mga stakeholders ag iba pang grupo sa isla.
Sa idaeom it proposisyong laye, ro GOCC ro magadumaea, magapa-umwad, magapadaeagan, magapabilin ag maga-rehabilitate it Boracay Island Development zone kaibahan eon kara ro kabilugan it isla ag mga nakapalibot nga isla kaeakip ro Barangay Caticlan.
Tuyo it proposisyong laye nga isueong ro responsableng turismo sa pamaagi it pakikibuylog it local communities kaibahan ro mga indigenous people nga magapangalaga it biophysical ag cultural diversity.
Ro BIDA Bill hay kaibahan sa priority bills nga gusto ni Pangueong Duterte nga insigidang maaprubahan.
