KALIBO, Aklan — Nagpanawagan si Atty. Plaridel Morania, sangka batikang abogado sa Aklan nga makaangkon it patas nga pahayag ro magtimbang nga parte angot sa kaso ni dating Pangueong Rodrigo Duterte.
Suno kana nga makaron hay kanya-kanya nga nagapaguwa it statement ro gobyerno ag kampo ni Duterte rason nga nagataeang ro publiko ag indi masayuran kon sin-o ro andang pagapatihan.
Kadungan kara, gin-insister ni Atty. Morania nga importante nga makaangkon it due process ag pagsunod sa laye.
Dapat man sigon nga likawan it magtimbang nga partido partikular it kampo ni Duterte nga magpaguwa it pahayag nga makapukaw sa kaakig it publiko bangud nga nakataya kara ro kamaeayran it nasyong Pilipinas.
Sa pihak nga parte, nakadepende eon sigon sa pagdesisyon it International Criminal Court (ICC) ro pagdesisyon kon pagataw-an it interim release ukon temporaryong kahilwayan si Duterte, kun sa siin, raya hay nakabase sa bug-at it kaso nga anang ginapangatubang ag bukon it bangud sa hinyu it anang mga tagasuporta kadungan sa ika-80 nga kaadlawan it dating presidente sa Marso 28.
Ginpahayag pa it abogado nga seryoso ro sitwasyon rason nga dapat nga masiguro nga may patas nga proseso para kay Duterte.
Ginpamilit pa nana nga dapat nga magapabilin nga patas ro sistema it hustisya, anuman ro posisyon sa pulitika.
Madumduman nga naaresto si Duterte sa Ninoy Aquino International Airport Terminal 3 may daywang domingo eon ro nagtaliwan matapos magpaguwa it warrant ro ICC angot sa mga alegasyon it crimes against humanity sa anang war on drugs , apang antes sigon kara hay ginbutang eon imaw sa listahan it red notice it Interpol.
