Sangka abogado, uman nga nagpadumdom sa publiko angot sa tama nga pagpili it igaboto nga kandidato

KALIBO, Aklan–Sa haeos sang dominggo eun lang antes ro adlaw it eleksiyon sa Pilipinas, uman nga nagpadumdom sa publiko ro sangka batikan nga abogado sa probinsya it Aklan.

Suno kay Atty. Plaridel Morania, makabig nga crucial ro petsa 9 it Mayo bangud dikara hay magapili ro mga pomoeuyo it lider nga magabuyot sa nasyon sa sueod it an-om nga dag-on.

Bangud kara, kinahangean sigon nga magpili ro mga botante it angay ag bagay nga kandidato nga magapungko sa nasyon ag indi magpadaea daea sa ginatao nga mga bagay, pagkaon ukon kwarta.

Mas manami man sigon nga magpreparar it listahan antes nga magsueod sa  mga presinto agud mapadali ro pagboto.