KALIBO, Aklan–Eubos ro kalipay nga nabatyagan it sangka Aklanon matapos nga makapasar sa kakatapos eamang nga May 2022 Certified Public Accountant Licensure Examination.
Suno kay Maychell Ann Dolinog nga haeos indi imaw makapati nga nakasapar imaw sa exam bangud masyadong malisod ro mga pangutana.
Mabahoe sigon ro naibulig kana it suporta halin sa anang pamilya, pagtao it focus ag maabu nga oras samtang naga-review.
Gingamit man sigon nana nga inspirasyon ro naangkon nga kapas-eawan sa unang kahigayunan it pagbuoe it board exam ko Oktobre 2021.
Owa sigon nana ginpabay-an nga maging sab-eag ro anang kapas-eawan para ipadayun ro anang handom nga maging CPA.
Gin-aku ni Dolinog nga naging mabahoe nga pressure kana ro uman nga pagbuoe it exam makaron nga dag-on apang naging ‘worth it’ man ro tanan nga sakripisyo ag pagpueaw matapos maeakip ro anang pangaean sa mga board passer.
Gin-enggayo man kara ro mga estudyante nga planong magbuoe it exam nga mag-focus sa andang ‘goal’ nga maging CPA, maging disiplinado ag magtaeana it bastanteng oras sa pag-review.
