Gin-engganyo it National Bureau of Investigation (NBI) si Senador Robin Padilla nga magbulig sa pagklaru kun paalin nga nakahalin si Senador Ronald “Bato” dela Rosa sa Senado matapos raya nga ibutang sa “protective custody.”
Suno kay NBI Director Melvin Matibag, gin-aku mismo ni Padilla nga ginpasakay nana si Dela Rosa ag ginpapanaog raya sa Makati, apang owa eon sigon nana nasayuran kun siin imaw nag-agto pagkatapos.
Ginpahayag ni Matibag nga bilang “responsableng senador ag pumueuyu,” dapat boluntaryong magbulig si Padilla sa imbestigasyon angot sa hana nga pagpatuman it warrant of arrest kontra kay Dela Rosa halin sa International Criminal Court (ICC).
Ginpamilit man it NBI nga dapat ipaathag it Senado ro kahueugan it “protective custody,” eabi pa ag may naging “gentleman’s agreement” sigon nga saeabton it Senado si Dela Rosa samtang sa andang kustodiya.
Suno kay Matibag, ro protective custody hay nagakahueugan nga dapat nga maipa-atubang ro sangka tawo sa mga awtoridad kon kinahangeanon it laye ag indi raya dapat nga obrahon nga pamaagi para makapaeagyo sa legal nga proseso.
Nagpaandam man imaw nga magiging maeain nga ehemplo kun mag-matsa “panaguan” it mga wanted person ro Senado.
Dugang pa nana nga importanteng mapabilin ro “law and order” sa nasyon eabi eon sa makaron nga tiempo nga madasig nga nagakalhit ro impormasyon ag nagkaeain-eain nga pahayag sa social media.
