KALIBO, Aklan–Nagtuga it grabeng kakueba ag pagkabaeaka sa mga estudyante ro ginahimo nga kabastusan ukon pag-masturbate it sangka eaeaki sa printi mimso it sangka boarding house sa Brgy. Estancia, Kalibo.
Suno kay Punong barangay Daisy Andrade nga pangaywang beses eon raya nga natabo.
Una sigon nga nagreport sa anang taeatapan ro mga estudyante kaibahan ro tag-ana it boarding house.
Kung siin, insigida nana nga ginmanduan ro mga barangay tanod nga magpatigayun it pagronda sa lugar eabi eon kung gabi-i dikara masami nga nagapakita ro owa pa makilaeang persona.
Apang, makataliwan ro sang dominggo hay uman nga natabo ro insidente rason nga ginpakamayad eon nanda nga magreklamo sa Kalibo PNP para sa nagakaigo nga aksyon.
Nahimo pa sigon nga mabue-an it litrato it mga estudyante ro motorsiklo nga ginasakyan it eaeaki apang owa naeakip ro bilog nga numero it plate number.
Ginabuebanta nga naga-edad it 50-anyos ro suspek, maniwang ro pang eawason ag nakasakay sa motorsiklo.
Nagaeaum sigon sanda nga insigidang madakpan ro suspek agud nga indi eon mauman pa ro kaparehong hitabo ag indi eon magtuga pa it dugang nga kakueba sa iba.
