Ginpadumdom it sangka health expert ro publiko nga magdaea it payong ag panangga sa grabeng silak it adlaw ag ipabiling hydrated para makalikaw sa mga sakit kaparehas it heat stroke, skin diseases, sore eyes ag sun burn.
Una kara, gin-anunsyo it PAGASA nga umpisa eon ro dry season ukon tag-init ag nagakahueogan nga tapos eon ro amihan.
Ginpaathag ni Dr. John Wibelle Ingles, OIC/MHO it Lezo Rural Health Unit nga nakakaangkon it sunburn ro sangka tawo pagkatapos nga mabuead sa idaeom it silak it adlaw it mahabang oras.
Bangud sa init, nagakasunog ro ibabaw nga layer it panit.
Mapuea ag mahapdi ro panit kon may sunburn.
Bangud kara, likawan ro pagbuead sa silak it adlaw.
Maggamit suno kana it sun block ukon sun screen para proteksyunan ro panit kontra sa mapeligrong ultraviolet rays halin sa silak it adlaw.
Samtang, ipabilin suno kana nga maging hydrated agud nga malikawan ro heatstroke.
Hanggat pwede hay limitahan ro pagguwa it baeay ag permi nga mag-inom it tubi eabi eon ro mga vulnerable sa nasambit nga sakit.
