KALIBO, Aklan–Sa pihak nga nagkaproblema ro online banking it Bank of the Philippine Islands ukon BPI hay nagpabilin nga kalmado ro sangka negosyante maskin nga naduea ro anang savings ag nagkautang pa imaw sa banko.
Suno kay Maureen Villanueva, bandang alas-8:00 it agahon kat ginsikyar nana ro anang account kon sa siin ginkakibot nana kat makit-an nga naubos eon ro anang savings ag nag negative pa imaw it kapin sa P47,000.
Angot kara, insigida imaw nga nagkutana sa anang mga kakilaea nga nagaobra sa bangko ag dikara nana napamatud-an nga nakaangkon it error sa system it nasambit nga bangko.
Sa pihak it natabo kana nga raya ro unang kahigayunan nga ana raya nga naeksperyensyahan hay uwa gihapon sigon imaw nadismaya sa bangko sa baylo loyal gihapon imaw nga kliyente.
Bandang alas-4:00 it hapon hay nagbalik sa dating kantidad ro anang savings.
Madumduman nga insigidang nagkalhit ro reklamo angot sa sistema it bangko kon sa siin insigida man raya nga naayos pagkahapon.
