Ginpakamayad ni Punong Brgy. Joseph Jencon L. Flores it Brgy. Catmon, Altavas nga sangka orok nga buhi ro iregalo sa mga ginaanak kara nga couple sa kasae.
Suno kana, uwa pa man imaw nagkapitan it baryo hay ginahimo eon nana ro pagpanupod it mga orok sa mga ginakasae, asosasyon it person with disabilities ukon pwd’s, senior citizen ag maging sa mga tricycle drivers.
Ordinaryo sa kasae nga makakita ka it mga regalo nga kagamitan sa sueod it baeay kon siin ginpaathag ni Flores nga posible raya nga inde magbuhay rason nga ginapakamayad kara nga ro eubusang handuman sa mag-asawa ro pagta-o it maumpisahan sa andang pagpangabuhi.
Madumduman nga nagviral sa sangka social media sites ro kasae nanday Elona Tolentino ag Joshua Pioquid matapos nga nakabaton ro mga raya it sangka buhi nga orok nga baboy bilang regalo sa andang kasae.
Samtang sa pihak nga parte, pabor sigon si Flores nga padayunon ro eleksyon sa barangay sa disyembre 5, 2022.
Suno kana, makaeoeooy ro barangay nga uwa nagatrabaho ro andang opisyales kon padayon nga maga-extend ro andang termino.
Apang, bentaha mat-a raya sa baryo nga may matuod tuod nga opisyales nga nagaserbisyo sa mga pumueoyo.
