KALIBO, Aklan—Sangka pitong dag-on nga unga ro maswerteng naeowas it anang ina samtang nagakasunog ro andang baeay, pasado alas-6, agahon it Martes sa Roxas Avenue Extension, Barangay Andagao, Kalibo.
Suno kay Emirita nalaunan, tag-ana it baeay ag lola it nasambit nga unga nga ginbuwis it ina ro anang kabuhi ag madasig nga nagsaka sa bungbungan it nagakasunog nanda nga baeay rason nga naeowas ro anang unga.
Ginasugid nga nagakatueog pa ro unga kat natabu ro insidente.
Nag-umpisa ro sunog sa ikaywang panaegan it andang baeay.
Sangka customer it andang baraka sa ubos it baeay ro nakapan-o sa naga-asu nanda nga ibabaw.
Madasig nga nagbahoe ro sunog , apang natapna ag owa eon nagkalhit ro kaeayo sa pag-abot it mga bumbero.
Nagbulig man ro mga kaeapitbaeay sa pagpaeong sa kaeayo.
Ginasugid nga totally burned ro second floor it baeay kaibahan ro andang mga papeles ag mga gamit.
Nagapati si nalaunan nga posibleng ro mga nakasaksak nga appliances ukon altar sa ibabaw it andang baeay ro ginhalinan it kaeayo.
Sa makaron hay nagapadayon pa ro imbestigasyon it Bureau of Fire Protection ukon BFP-Kalibo sa rason it sunog.
Uman nga gin-abisuhan ro mga residente nga mag doble dahan agud nga malikawan ro mga insidente it sunog eabi pa ag grabe ro naeksperyensiyahan makaron nga init it paniempo.
