Kalibo Aklan —–Gindaea sa presuhan it anang mga kabaro ro sangka patrolman matapos nga makitang nagatikang nga hubeas ag medyu owa sa anang kaugalingon sa Sitio Cagban, Brgy. Manocmanoc, Boracay.
Ro pulis nga owa eon ginpangaeanan hay presenteng naka-assign sa Malay Police Station.
Base sa report, nakita it sangka residente ro pulis nga nagatikang sa lugar nga hubeas.
Insigida nga gin report sa pulisya ro insidente rason nga eagi man nga rumesponde ro mga raya ag gin deretso sa presinto.
Ginasugid nga nakaangkon it depresyon ro pulis matapos nga gina-alegar nga ginbueagan it anang fiancée ag nagsunod sa ibang eaeaki nga ginasugid nga pulis man.
Ginpahayag pa nga antes pa man ro andang kasae hay ginbueagan imaw it anang nobya .
Nakataeanang pagasueangon it anang pamilya ro nasambit nga Police Officer .
Samtang sa pakikipag-angot it Bombo Radyo, nagpamalibad eon nga magtau it dugang nga detalye ro Malay PNP sa nasambit nga insidente.
