KALIBO, Aklan—Ginreklamo sa Bombo Radyo it sangka senior citizen ro andang barangay council matapos nga matukiban nga may ibang tawo nga nagpirma para sa anang pangaean sa pag-claim it ayuda nga abono sa Barangay Jawili, Tangalan.
Ro ginapanupod nga abono hay para sa mga benepisyaryong mangunguma nga residente it nasambit nga lugar halin sa Department of Agriculture.
Suno sa tagreklamong si Nene Ingeniero, residente it nasambit nga barangay nga makabig nga falsification of public documents ro natabu matapos nga gina-alegar nga gin-peke ro anang pirma sa sangka dokumento nga nagapabutyag nga nakabaton imaw it abono.
Nakibot sigon imaw nga may nag-imporma kana nga may kueang pa imaw nga pagapirmahan nga dokumento, apang sa pag-usisa sa andang barangay hay pirmado raya it ibang tawo.
Ginpahayag dugang nga owa imaw it mabo-oe nga matino nga sabat halin sa barangay bangud nga nagatueur-an ro mga raya.
Kon owa pa suno kana imaw naka-agto sa barangay ko nagtaliwan nga Enero 23, 2023 para sa ibang tuyo hay posibleng owa nana nasayuran nga may ayuda imaw nga abono bangud nga owa man it may nag inform kana.
