NATIONAL News — Hugut nga nagapakamatig-a si Senador Ronald “Bato” Dela Rosa kontra sa posibleng pagdihon it warrant of arrest it International Criminal Police Organization (InterPol) halin sa International Criminal Court sa The Hague angot sa kasong crimes against humanity.
Uman nga ginpamilit ni Dela Rosa, dating hepe it Philippine National Police (PNP) nga nagpatuman it Oplan Tokhang sa Duterte administration, nga indi imaw magasurender sa anumang arrest warrant nga igapaguwa it ICC.
Sa pihak kara, gin-aku ni dela Rosa nga indi imaw magapaeagyo sa nasyon.
“Hypothetical? Hindi ako magpahuli. Hindi ako sasama. Hindi ako lalabas sa aking comfort zone. My comfort zone sa Philippines. Bakit ako pupunta sa ibang bansa? Dito ako sa Pilipinas. Dito ako pinanganak. Dito ako mamamatay sa bansa kung sinilangan,” pahayag ni dela Rosa.
Reaksyon raya ni dela Rosa matapos arestuhon si dating Pangueong Rodrigo Duterte ko Marso 11 ag madasig nga gindaea sa The Hague kun sa siin nakakulong imaw sa ICC Detention Facility.
Nagapangatubang si Duterte kaibahan si dela Rosa ag pila pang indibidwal sa kasong crimes against humanity sa paglunsar it madugong war on drugs nga ginaboeobanta nga naga-abot sa masobra sa 30,000 kaibahan ro vigilante killings nga nailista it pilang human rights organizations.
Nagsirbi si dela Rosa bilang hepe it PNP sa paglunsar it Oplan Tokhang ko 2016.
Naunang ginpahayag it ICC nga may una pang siyam nga katawong akusado sa igadihon nga arrest warrant apang, nabawasan raya ag napabilin ro pangaean ni dela Rosa.
Dugang pa ni dela Rosa nga nagdesisyon imaw nga indi magapadakop bangud nga nakikita nana ro kawad-an it hustisya sa administrasyon ni Pangueong Ferdinand “Bongbong” Marcos Jr. nga gina-surender ro sin-o man nga Filipino nga owa sigon it due process.
