KALIBO, Aklan — Kapin sa 1,500 nga pulis ro igapakalhit agud nga masiguro ro kaeowasan ag seguridad it mga delegado nga magatambong sa pueong it Association of Southeast Asian Nations (ASEAN) sa Isla it Boracay umpisa sa Disyembre 10 hasta 13 it makaron nga dag-on.
Ro ap-at nga adlaw nga pagtililipon hay sambilog eamang sa pilang Asean events nga pagahiwaton sa nagkaeain-eain nga parte it nasyon kaibahan ro Manila, Cebu, Bohol, Laoag, Iloilo, Tagaytay, ag Clark.
Suno kay P/Capt. Aubrey Ayon, tagapaghambae it Aklan Police Provincial Office (APPO) syento porsiyento eon nga haum ro probinsiya para sa pagpatigayon it mabahoe nga international nga pagtililipon.
Nakataeana sigon ro send-off ceremony para sa deployment sa Disyembre 7 bago ro pag-aeabutan it kapin sa 200 nga mga delegado halin sa nagkaeain-eain nga miyembrong estado it ASEAN.
Sa nasambit nga numero, masobra sa 500 ro augmentation forces halin sa provincial police offices sa Western Visayas, kun sa siin igadeploy ro mga raya sa Caticlan ag isla it Boracay.
Hugut sa gihapon suno kana nga igapatuman ro one entry, one exit policy sa Boracay kapareho it nakasanayan nga pagabantayan it Philippine Coast Guard ag Maritime police.
Samtang, ginpahayag pa ni Ayon nga owa it parte it isla ro igabutang sa restricted access maskin nga may high-level meeting.
Nasayuran nga ko Nobyembre 26, nakiparte ro PRO-6 sa Department of the Interior and Local Government Region 6 sa Inter-Agency Coordinating Conference para sa ASEAN Senior Economic Officials Meeting Retreat 2026.
Ro Asean 2026 hay may temang “Navigating Our Future, Together,” kun sa siin ro Pilipinas ro magatindog nga tagapangueo.
