KALIBO, Aklan—Gindayaw ag ginahangaan makaron ro sangka Sangguniang Kabataan Chairman matapos nga nakaangkon raya it ideya kon paano makadonate it school supplies ag iba pang kagamitan sa estudyante it Day Care Center it Brgy. Feliciano, Balete makaron nga school year 2019-2020.
Suno kay SK Chairman Ryan Macatangay ag residente it nasambitang lugar, bilang mga pamatan-on sigon nga nakabueo it pwesto sa barangay hay mabahoe ro maibulig kara agud nga maipakita ro abilidad ag kapasidad sa pagbulig sa isigkatawo.
Bilang pangunang proyekto sa andang lugar, nagpinamueot sigon imaw it basura sa palibot kaibahan ro anang ibang council kon sa siin anda raya nga ginbaligya ag ro naging kita hay andang ginbakae it school supplies sa mga onga.
Ginpaathag nga uwa pa it budget nga ginpaguwa ro gobyerno para sa mga SK rason nga kinahang-ean nanda nga mag-isip it paraan agud nga sa umpisa pa eamang hay maipakita eon ro andang kagustuhan nga makaserbisyo sa baryo.
Suno pa kay Macatangay, naging hangkat sa anang pagkatawo ro maging lider it mga pamatan-on sa barangay rason nga ginhimo kara ro tanan nga masarangan agud nga mapun-an ro anang responsibilidad maskin sa simple eamang nga pamaagi.
Mag-eowas suno kana nga makabulig imaw sa mga onga hay makapalimpyo pa raya sa andang palibot eabi eon makaron nga sambilog ro banwa it Balete nga may maabong kaso it baeatian nga dengue.
