KALIBO, Aklan—All systems go eon ro sangguniang panlalawigan para sa pagahiwaton nga kauna-unahan nga State of the Province Address ukon SOPA ni governor Joen Miraflores sa Martes nga adlaw, Agosto 22, alas-2:00 it hapon sa SP session hall.
Suno kay Merlyn Montaño, SP secretary nga nakasueod ro SOPA it gobernador sa ika-53rd session it provincial board kun sa siin owa it iba pang agenda nga pagatalakayon agud nga mataw-an raya it maeawig nga oras.
Ginpahayag dugang nga magiging simple eamang ro SOPA.
Limitado eamang sigon ro imbitado sa event kaibahan ro nagkaeain-eain nga mga municipal mayors it probinsiya, mga provincial heads it provincial capitol ag mga national government agencies, kamana man ro iba pang mga indibidwal halin sa pribadong organisasyon bukon it kapareho ko nagtaliwan nga mga dinag-on nga maabu ro mga dinapit nga bisita.
Samtang, ginkumpirma ni Montaño nga pagkatapos it SOPA hay makaangkon it press conference agud nga mataw-an it kahigayunan ro mga katapo it media nga makapangutana para sa dugang nga klaripikasyon.
Ro magasueang kay governor Miraflores antes ro SOPA hay ro mga last termer board members nga sanday nemesio neron ag Jay Tejada kamana man si provincial SK federation president Blessie Jismundo ag ABC president Ciriaco Feliciano.
Ro State of the Province Address hay ro dag-unan nga report it gobernador nga naga-highlights sa accomplishments it Provincial Government sa nagtaliwan nga dag-on kamana man ro mga nagapangunang plano ag programa para sa masunod nga dag-on base sa presenteng development framework it administrasyon.
Ro pagpatigayon it SOPA hay sandig sa Local Government Code ag gina-presentar sa SP, mga opisyal, empleyado ag sa publiko.
