KALIBO, Aklan—Business as usual ag nagapabilin nga bukas ro Sangguniang Panlalawigan it Aklan agud nga magtau it serbisyo sa publiko.
Raya ro ginkumpirma ni SP consultant Odon Bandiola matapos nga magkalhit ro balita nga iga-lockdown ro nasambit nga taeatapan kasunod it gina-alegar nga may sangka empleyado nga nag positibo sa coronavirus disease 2019 ukon covid 19.
Sa pihak kara, medyu hugut sigon ro andang ginapatuman nga health protocols antes nga makasueod sa SP building nga ginaeakipan it mandatory checking it temperature ag ro paggamit it alcohol sa kada entrance it edipisyo agud nga makalikaw sa sakit.
Samtang, aminado si Bandiola nga may sangka nurse it Aklan provincial hospital nga nakipagkita sa sangka staff ni Board Member Juris Sucro may daywang domingo eon ro nagtaliwan agud nga magpangayo it face shield, kun sa siin ro nasambit nga nurse hay sambilog sa mga nag positibo sa covid 19 nga staff it nasambit nga ospital.
Apang ginklaru kara nga owa man raya nakasueod sa SP building.
Matuod man suno kana nga sambilog sa pamilya it andang sangka empleyado hay namatay bangud sa gina-angkon nga baeatian, ag ginboe-an man it swab specimen sample, kun sa siin owa pa nagguwa ro anang RT-PCR test result.
Sa pihak kara, padayun sigon ro mga ginapatigayon nga sessions ag committee hearings it provincial board ag sa kamatuoran hay naga-marathon hearings sanda makaron angot sa annual investment program it Aklan para sa dag-on 2021, kun sa siin hugut nga ginapatuman ro physical distancing eabi pa ag may mga gina-imbitahan nga resource persons.
Ro annual investment program hay bilang preparasyon sa paghimay it pondo it probinsiya sa masunod nga dag-on nga nakataeanang pagatalakayon sa katung-anan it buean it Oktubre.
Bukon man sigon it apektado ro andang pagbaton it mga request para sa mga financial assistance it mga kliyente nga nagapangayo it bulig.
Samtang, nagpanawagan man imaw sa publiko nga likawan ro pagpakalhit it mga fake news bangud nga mas eamang raya nga nagatau it kakugmat sa publiko.
