KALIBO, Aklan—Ginsuhestiyon ni Sangguniang Panlalawigan member Nemesio Neron nga siguraduhon it mga contractor it karsada ro kalidad it andang proyekto para indi magtuga it mabahoe nga perwisyo sa mga pumueoyo eabi eon sa mga nagabiyahe nga motorista.
Ro pahayag ni Neron hay kasunod it natabo nga aksidente nga gina-imbolbaran ni Patrolman Genard Cezar, residente it Sitio Cagban, Brgy. Manoc-manoc sa isla it Boracay.
Matueopangdan nga sumunggab sa barikada sa under construction nga karsada it Brgy. Bacan, Banga ro nasambit nga police officer kung siin nakaangkon raya fatal nga lastro sa ueo ag iba pang parte it eawas nga gintunaan it anang hinali nga kamatayon.
Suno kay Neron dapat nga mabutangan it nagakaigo nga warning device ag iwag ro nasambit nga karsada eabi pa ag masami raya nga nagiging takaw-aksidente.
Mag-eowas kara, kinahang-ean man nga maging responsable ro contractor it mga underconstruction nga karsada para malikawan ro pilang ka mga aksidente kamana man nga ro mga motorista hay maging madahan sa pagmaneho ag likawan ro pagbiyahe nga naka-inom.
Dugang pa kara nga sambilog sa nagapangunang rason it pagka-delay it mga proyekto ukon konstruksyon it provincial road hay bangud sa pabag-o bag-o nga weather condition.
