Sangka startup company sa United Kingdom ro nagpakilaea it bag-ong pamaagi it pagbutang it permanenteng tattoo nga ginasugid nga haeos owa it sakit ag indi eon magakinahangean it tradisyonal nga tattoo machine.
Ro London-based company nga Cipher X hay nagagamit it ginatawag nga “Microdot” patch nga may masyado kaisot nga dagum. Sa baylo nga pauman-uman nga tuslok kapareho it ordinaryong tattoo, ro mga microscopic needle hay sangkiri nga nagatagos eamang sa ibabaw it panit agud nga mapasueod ro tinta.
Suno sa kompanya, gintukod raya it CEO nga si Ferdinand Kohle bangud sa anang kahadlok sa dugo ag dagum. Tuyo nana nga makabilog it mas madaling pamaagi it pagpa-tattoo para sa mga tawong gusto it permanenteng tattoo apang ginalikawan ro sakit it tradisyonal nga proseso.
Ginapilit ro patch sa panit it masobra sa 15 minuto bago amat-amat nga nagaguwa ro disenyo sa sueod it 24 hasta 48 oras. Sa makaron, limitado pa raya sa mga maintok nga itom nga simbolo nga hasta sa 15 millimeters ro kabahoe ag available eamang sa pilang pili nga lokasyon sa London.
