KALIBO, Aklan—Ginatinguhaan makaron it Kalibo Sto. Niño Ati-atihan Management Council ukon KASSAMCO Inc. nga mapataasan ro subsidy it tanan nga mga naka-rehistro nga tribu ag grupo nga magapasakop sa 2020 sadsad Ati-Atihan street dancing contest.
Suno kay KASSAMCO chairman Apol Zaraspe III nga pilang mga dating major sponsors it festival ro nagpahayag it interes nga magabulig.
Pila sa mga plano makaron it event organizer nga ibalik sa dating rota ro ginasadsaran it mga tribu ag grupo nga maghalin sa Mabini hay maga-deretso sa Roxas Avenue, paagto sa Gonzales St., C. Laserna, Rizal St. ag pasueod sa Pastrana Park.
Gusto man nanda nga ibalik ro judging sa daeanon.
Mayad man sigon nga ideya nga himuon nga one-way ro Roxas Avenue agud nga mataw-an it chansa ro mga turista sakay it mga tourist bus paagto sa Boracay nga makaangkon it kahigayunan nga masid-ingan ro Ati-Atihan Festival.
Samtang, agud nga indi maggutok sa Pastrana Park, plano man nanda nga sang beses eang nga makatiyog kara ro mga tribu ag grupo.
Ginsambit pa kara nga makikipag-tie-up man sanda sa iba pang TV network agud nga magdaea it mga sikat nga artista nga makadugang sa kasadya it selebrasyon.
Sa oras sigon nga matapos ro civic center sa ibabaw it Kalibo Pastrana Canteen, dikara magabutang it opisina ro KASSAMCO.
