Ginkumpirma it PAGASA nga indi magasueod ukon manaba ro tsansa nga magasueod sa Philippine Area of Responsibility (PAR) ro Tropical Cyclone Sinlaku nga nagbaskog bilang super typhoon.
Mag-eowas kara, owa ginaeauman nga maaapektuhan it bagyo ro tiempo sa nasyon.
Daea it Sinlaku ro kabaskog it hangin nga 205 kilometers per hour ag pagbugsong naga-abot sa 250 kph. Nakit-an raya sa kaeayuon nga 2,580 kilometro nasidlangan it Visayas bandang alas-3 it aga-aga it Lunes ag nagahueag paagto sa nakatungdan naaminhan nakatungdan sa kadasigon nga 15 kph. Ginaeauman nga maga-agi raya maeapit sa Guam ag Northern Mariana Islands sa Abril 14.
Samtang, padayun man nga maeksperyensiyahan sa Pilipinas ro mainit nga tiempo. Suno sa PAGASA, ro ridge it high pressure area sa Northern Luzon hay nagalimita sa pagbilog it clouds rason nga nagapabilin nga mainit ag maea ro paniempo sa naaminhan.
Sa ibang parte it nasyon, mainit man ro paniempo nga may posibilidad it mga maeaka nga pag-uean ukon thunderstorms sa hapon.
Posibleng mag-abot sa danger level nga 42°C ro heat index sa Cotabato City, adlaw it Lunes.
May 10 pang lugar, kaabuan sa Luzon, ro posibleng mag-abot sa 40°C hasta 41°C heat index:
41°C: Borongan City, Cavite City, Coron (Palawan), Dumangas (Iloilo), Zamboanga City
40°C: Aparri (Cagayan), Pasay City, San Ildefonso (Bulacan), Tanauan City, Tuguegarao City.
Nauna eon nga ginpahayag it PAGASA nga ro tag-init sa nasyon hay kaeabanan nga pinakamainit kada Abril hasta sa unang katunga it Mayo, ag posibleng mag-abot pa sa 40°C ro temperatura sa Northern at Central Luzon makaron nga buean.
