Puro mga mayad nga tawo ro magkaeapitbaeay nga naeakot sa insidente it pagpamaril nga ginkamatay it biktima bandang alas-9:15 gabi-i it Huwebes sa Purok 7, Brgy. Kinalangay Nuevo, Malinao.
Suno kay Punong Barangay Arlene Infante nga owa it record sa barangay ro suspek nga si Ricky Rapiz samtang ro biktimang si Darius Zaspa hay dating naeakot sa mainitan nga diskusyon tuga it kahilungon, apang madasig nga naresolba ro reklamo kontra kana.
Dugang pa nga blangko sigon imaw sa motibo it krimen bangud nga owa man it dating record nga nag-away ro daywa.
Nauna eon nga ginpahayag it Malinao Municipal Police Station nga base sa andang inisyal nga imbestigasyon, nagbakae ro biktima sa baraka ko igmanghod it suspek ag sa anang pag-uli hay dikara eon imaw ginbinaril ni Rapiz.
Ginatumod pa makaron it mga kapulisan ro motibo sa likod it nasambit nga insidente.
Namatay samtang ginabueong sa Aklan provincial hospital ro biktimang si Zaspa samtang si Rapiz hay nagpaeagiw matapos nga mahimo ro krimeN.
Apela ni Kapitan Infante nga magsurender eon ro suspek.
