BALITANG Espesyal — Bangud sa uso, maabu nga kababayin-an ro nagasuksok it crop tops.
Maskin mga kaeaeakin-an, naga-crop top man kaibahan si two-time Olympic gold medalist Carlos Yulo nga nag-trending sa nagkaeain-eain nga social media platforms.
Apang paalin kun bangud sa suksok mo nga crop top hay pagapapanaugon ikaw sa eroplano?
Kapareho sa natabu sa tatlong babaye nga pursigido makaron nga mag-file it reklamo kontra sa sangka kompaniya it eroplano matapos sanda nga ginpapanaog bangud sa andang mga suksok nga eambong.
Nag-umpisa ro insidente kat magsakay ro mag-amiga nga sanday Tara Kehidi ag Teresa Araujo nga halin sa Los Angeles, California ag paagto kunta sa New Orleans, Louisiana.
Kat nagasaka pa eamang ro daywa, may sweater pa sanda, apang gin-uba nanda raya bangud nga owa pa ginapaandar ro air conditioning system it cabin samtang owa pa naka-take off.
Sa owa nagbuhay, ginpaeapitan sigon sanda it sangka eaeaki nga flight attendant ag agresibo sanda nga ginhambaean nga magsuksok it sweater.
Nabatian raya it sambilog pa nga babaye nga pasahero nga si Carla Hager nga sa rato nga tiempo hay may kaibahan nga unga nga eaeaki.
Ginsuportahan kara ro mag-abyan bangud nga mainit gid man ko rato nga tiempo, ag timing man nga naka-crop top imaw ag naka-sweater.
Bangud sa komosyon, gin-uba man kara ro anang sweater bangud gusto nana nga ipakita ro anang suporta sa mag-amiga maskin nga bukon sanda it magkakilaea.
Ko ulihi hay tatlo sanda nga ginpapanaog sa flight ag owa gintaw-an it refunds!
Suno kanday Tara ag Teresa, ginhambaean pa nanda ro attendant kun pwede nga magasuksok sanda it uman it sweater, apang owa eon ginpasugtan.
Nag-gasto pa ro mag amiga it 1,000 USD ukon P57,000 para sa last-minute flight paagto sa New Orleans bangud idtu sanda maga-selebrar it birthday ni Tara.
Masyadong maeain ro andang buot sa natabu bangud nga matsa ginkabig sanda nga mga criminal bangud eamang sa suksok nga crop top.
Base sa Contract of Carriage it airline company, pwede nandang baeabagan ro customer ukon pasahero kun sanda hay owa it suksok nga sapatos ag bukon it angay ag bagay ro andang eambong.
Owa man ginklaru kon ro kaeakip ro crop top sa mga ginakabig nga “lewd, obscene, or offensive in nature.”
