Kinahang-ean nga may elemento it pagloko sa transaksyon it pag-utang para may basehan sa pagpasaka it kaso.
Apang, nakadepende sigon sa klase it transaksyon sa pag-utang kon anong klase it kaso ro igapasaka kontra sa tawo.
Raya ro paathag ni Atty. Harry Sucgang angot sa ginapangatubang makaron nga reklamo it dating brodkaster nga si Carlo Astorias matapos nga pilang ka indibidwal ro nagpaabot it hibubun-ot matapos nga mautangan ni Astorias hay uwa eon sanda ginabalikda.
Ginpaathag dugang ni Atty. Sucgang nga inde pwede pwersahon ro sangka tawo agud nga makabayad eamang it anang utang bangud nga posible nga ikaw pa kara ro balikan nakadepende sa imu nga pag approach sa tawo.
May proseso sigon nga ginasunod sa laye ag may nagakaigong kaso nga pwedeng ipasaka sa manug-utang nga uwa nagasunod sa andang obligasyon.
Nauna eon nga ginaduso makaron it Aklan Media Integrated Alliance ukon AMIA nga ideklarang persona non grata si Asturias bangud sa paghigko kara sa imahe media industry sa probinsya.
Madumduman nga sa unang tagreklamo hay P15,000 pesos ro nabueo ni Astorias nga sinanglaan pa it alahas samtang P20,000 pesos man sa pangaywang tagreklamo nga inugbayad kunta sa hospital bill.
