Arestado ro sangka 49-anyos nga tricycle driver sa buy-bust operation nga ginpatigayon it Kalibo Municipal Police Station kahapon, adlaw it Martes, Agosto 11, 2026.
Ro suspek hay ginkilaea kay alyas “Joey” nga residente it Ibajay, Aklan.
Suno kay P/Lt/Col. Jerick Vargas, hepe it nasambit nga taeatapan, haeos daywang dominggo nga ginamonitor ro nasambi nga persona matapos makabuoe it impormasyon halin sa mga residente parte sa anang ginapatigayon nga pagbaligya it illegal drugs sa Kalibo.
Dati eon man sigon raya nga nadakpan sa kaso nga may kaangtanan sa illegal drugs ag nakapag-plea bargain.
Sa buy-bust operation, habakae sa suspek ro sangka sachet it ginasuspetsahan nga shabu.
Sa pag- body search kana, narekober pa ro lima ka sachet nga may sueod nga ginasuspetsahan nga shabu, mageuwas sa ₱500 buy-bust money ag ₱6,500 nga boodle money.
Narekober man ro cellphone ag motorsiklo nga gin-gamit it suspek sa pagbiyahe halin Ibajay paadto sa Kalibo.
Dugang pa ni PLt.Col. Vargas, ginakabig imaw nga street-level drug personality nga naga-operate sa maisot nga kantidad it iligal nga droga.
Sa makaron, una eon sa kustudiya it Kalibo MPS ro suspek nga posibleng mag-atubang sa kaso nga pag-eabag saRepublic Act 9165 ukon Comprehensive Dangerous Drugs Act, partikular sa Section 5 para sa pagbaligya ag Section 11 para sa illegal possession.
Posible man nga madugangan ro kaso sa Section 15 kon magpositibo imaw sa drug test.
Samtang ginapreparar ro dokumentasyon ag medical examination it suspek, nakikipag-angot man ro Kalibo MPS sa Ibajay MPS para sa pag-usisa sa posible nga ginabue-an it iligal nga droga.
