KALIBO, Aklan—Ginklaru it tricycle driver nga si Querubin dela Vega nga owa nana ginpapanaog sa anang saeakyan ro tagreklamong senior citizen nga si Marlyn Magarzo, 69-anyos ag residente it Brgy. Tabayon, Banga.
Suno kana nga si Magarzo mismo ro nagpanaog sa anang tricycle matapos nga makasakay eon ro daywang estudyante nga anang ginkontrata.
Matapos nga magpanaog sa multicab nga biyaheng Banga sa may Jaime Cardinal Sin, Andagao, Kalibo, hay gulpi sigon nga nagsakay sa anang tricycle ro magueang ag nagapahatud sa Kalibo water district.
Ginbalibaran sigon nana raya bangud nga paagto sa sangka establisimento maeapit sa Kalibo public market ro anang daywang pasahero.
Posible suno kana nga nagsakay ro magueang sa sambilog pang tricycle ag ginsundan imaw hasta nga nabo-oe ro anang body number.
Nakibot eon lang sigon imaw matapos nga gintawagan nga ginapa-report sa kalibo municipal police station ag Traffic and Transport Management Division ukon TTMD Kalibo agud nga atubangon ro reklamo kontra kana it anang pasahero.
Raya suno kana ro kauna-unahan nga kahigayunan nga imaw hay ginreklamo sa sueod it haeos 20 anyos nga pagiging tricycle driver.
Angot kara, nagpangayo it pasaylo si dela vega engkaso nga imaw gid man ro may saea.
