BALETE, Aklan—Bumunggo ro sangka truck sa railings bandang alas-8:00 gabi-i it Biyernes sa kilid it national highway nga sakop it Brgy. Feliciano, Balete.
Suno kay P/Master Sgt. Jameo Mondia it Balete Municipal Police Station nga base sa panaysayon it truck driver nga samtang naga-agi sa paubos ag kurbada nga karsada hay naduea-an imaw it kontrol sa manibela rason nga bumanggo sa railings.
Sugang pa nga madanlog ro karsada tuga it sigidas nga pag inuean.
Halin sa banwa it Kalibo ag nagapabalik eon kunta sa Iloilo ro truck kat matabu ro insidente.
Sa mayad nga swerte, owa man it napabalita nga namatay ag nakaangkon eamang it minor injury sa alima ro driver samtang ro anang kaibahan hay owa nag-angkon it anuman nga lastro.
Na-damaged ro porsyon it railings ag truck nga sangka freight liner tractor head nga ginapanag-iyahan it sangka construction company sa Mandurriao, Iloilo.
Samtang, uman nga nagpadumdum ro kapulisan sa mga motorista nga pirme nga magdahan kon nagabiyahe eabi eon kon mauean ag madanlog ro karsada.
