BALITANG Espesyal —- Sangka gang it mga scrap metal thieves ro nagpanakaw it 500 toneladang abandonadong tulay sa Bihar, India!
Nakibot ag naakig ro Indian netizens matapos maging headline it mga balita ro angot sa pagpanakaw sa sangka tulay nga may habang 60 feet .
Suno sa mga awtoridad, nagpakuno-kuno ro mga manakaw nga government irrigation officials matapos sanda nga kuwestiyunon it mga residente it nasambit nga lugar.
Gamit ro daea nanda nga mga bulldozer ag gas cutters, gin-guba nanda ro iron bridge sa sueod it daywang adlaw ag gindaea ro mga scrap metal kara gamit ro sangka container truck.
Ginpatindog ko 1972 ro tulay ag mabuhay eon nga ginpundo ro paggamit kara bangud nga luma ag delikado eon raya nga agyan .
Ko Huwebes, naglunsar ro mga awtoridad it maeapnagon nga imbestigasyon ag sa makaron, waeong katawo eon ro gin-aresto bangud sa pagpanakaw.
