Obrahon nga legal ag papanaugan it nagakaigo nga buwis ro ukay-ukay halin sa guwa it nasyon nga mas madahog sa online.
Raya ro suhestiyon ni Senador Raffy Tulfo sa Bureau of Customs (BOC) sa pagpamati it Senate Committee on Ways and Means nga anang ginapamunuan.
Ginsita ni Tulfo ro BOC bangud sa padayun nga pag-abu it mga baealigyaan it mga ukay-ukay nga halin sa ibang nasyon nga gina-alegar nga ginabawae it laye.
Raya hay bangud nga ro mga second hand nga eambong hay pang donasyon dapat sa mga nadaeasa it kalamidad ag para sa mga pigado ag indi dapat nga ibaligya ag dapat nga diretso raya sa Department of Social Welfare and Development (DSWD) ukon sa mga charitable institution.
Samtang, ginkumpirma man ni Customs Deputy Commissioner Edward Buco, nga bawae nga ibaligya ro mga second hand nga eambong ag may mga anti-smuggling operations eon sanda kara apang nagiging innovative eon man ro mga smuggler.
Posibleng indi sigon masarangan nga kontrolon it BOC ro pagsueod it ukay-ukay rason nga dapat maghimo it sistema ukon obrahon nga legal raya bangud sa idaeum it Republic Act 4653 hay ginabawae ro importasyon it mga eambong agud nga maprotektahan ro ikamayad nga eawas it publiko.
