KALIBO, Aklan—Uman nga paga-usuyan it negatibong RT-PCR test results umpisa sa Enero 9 ro mga turistang magabisita sa isla it Boracay.
Raya hay base sa ginpaguwa nga Executive Order No. 001 series of 2022 ni Aklan Governor Florencio Miraflores bangud sa paeag it Omicron variant it COVID-19 ag nagataas nga numero it mga kaso sa National Capital Region ukon NCR.
Suno kay provincial administrator Atty. Selwyn Ibarreta nga mag-eowas sa mga turista, kinahangean man nga ro mga returning aklanons hay mag-presentar it negatibong RT-PCR test result 72 oras antes ro pagbiyahe.
Ro tanan man sigon nga mga turista hay kinahangean nga sa Caticlan airport eon man mag-agi ag indi eon sa Kalibo international airport.
Mag-eowas sa RT-PCR test ro mga returning aklanons hay kinahangean nga magpangayo it notice of acceptance halin sa banwa nga paga-uli-an.
Ro tanan nga mga turista ag travelers nga nagasueod sa probinsiya hay kinahangean nga magbo-oe it QR code pinaagi sa online health declaration card nga pwedeng ma-access sa www.touristboracay.com kamana man ro vaccination card ukon vaccination certificate.
Sa pihak nga parte , uman nga ginbalik ro curfew hours sa Boracay nga alas-10:00 it gabi-i hasta alas-4:00 it agahon samtang sa mainland Malay ag iba pang banwa sa Aklan hay alas-9:00 it gabi-i hasta alas-4:00 it aga-aga.
Raya hay halin sa dating ala-1 it aga-aga hasta alas-3 it aga-aga ko buean it Disyembre.
Umpisa Oktubre 2021, nakaexperiensiya ro Boracay it gulping pagtaas it tourist arrivals, kun sa siin, ko buean it Disyembre nakalista it record high nga 113,596 makaron nga tiempo it pandemya.
Sa pinaka-ulihing datos it Provincial Epidemiology and Surveillance Unit (PESU), nakalista it pitong bag-ong kaso it COVID-19 sa probinsiya it Aklan.
