Bukon it bilib si House Deputy Minority Leader and ACT Teachers Representative Antonio Tinio sa “Upper-middle income” status it Pilipinas base sa klasipikasyon it World Bank.
Ginpamilit ni Tinio, owa raya it pueos ag indi dapat nga ipabugae kun padayun nga naga-antus ro mga trabahanteng Pilipino nga na-eansang eon ro sweldo sa P510 kada adlaw nga owa pa it katunga sa P1,312 nga ginakinahangean nga living wage.
Gusto man nga masayuran ni Tinio kun sa boesa baea it mga kapitalista ag mga kurakot ukon siin baea naagto ro ginahambae it World Bank nga pagbahoe it ekonomiya it nasyon sa average nga 5.8 percent kada dag-on nga indi man mabatyagan it mga trabahador.
Suno kay Tinio, ro kinahangean makaron hay ro matuod nga ekonomikong pag-umwad kun sa siin ro tanan nga trabahador hay nagakita it living wage ag may access sa basic services.
Panawagan ni Tinio, indi kita paglokohon it mga numero ag mga klasipikasyon bangud nga ro matuod nga sukatan it pag-umwad hay ro pag-angkon it kada Pilipino it dignidad, seguridad sa trabaho ag bastante nga kita para sa andang pamilya.
