Gusto it Estados Unidos nga mapadasig eon ro pagresolba it Pilipinas sa hinyu kara nga ipa-extradite sa US si Kingdom of Jesus Christ founder Apollo Quiboloy.
Suno kay Philippine Ambassador to the US Jose Manuel Romualdez, naipasa eon it Department of Foreign Affairs sa Department of Justice ro pormal nga extradition request, rason nga nakadepende eon sa mga awtoridad it Pilipinas ro pag-usisa ag pagdesisyon sa nasambit nga isyu.
Si Quiboloy hay nakadetine sa Pasig City Jail umpisa Setyembre 2024 angot sa mga kasong may kaangtanan sa pagpang-abuso sa mga unga ag qualified human trafficking. Gina-usoy man imaw it US Federal Bureau of Investigation angot sa kasong sex trafficking sa Amerika.
Ginpahayag ni Justice Secretary Fredderick Vida nga maid-id nga pagatun-an it DOJ ro hinyu, kaibahan ro mga kasong ginapangatubang ni Quiboloy sa Pilipinas, mga naging desisyon it Korte Suprema, ag mga probisyon it extradition treaty it Pilipinas ag US.
Pwede sigon nga temporaryong ipadaea si Quiboloy sa US para sa pagbista ag ibalik sa Pilipinas matapos ro kaso, ukon ipaiway ro extradition hasta matapos ro mga pagbista sa nasyon.
Ginpasiguro it DOJ nga pagataw-an it prayoridad ro pag-usisa ag igapahisayod ro magiging desisyon sa mas madali nga tiempo.
