KALIBO, Aklan—Ginpahayag ni US President Joe Biden nga pagatapuson eon nanda ro COVID-19 emergency declarations sa Mayo 11.
Suno kay Bombo International Correspondent Greg Aguilar it California, USA raya hay makataliwan ro haeos tatlong dag-on nga ro nasambit nga nasyon hay sa idaeum it hugut nga mga restrictions bangud sa pandemya.
Ginpahayag dugang nga ko 2020 hay gindeklara ni dating Pangueong Donald Trump ro COVID-19 national emergency ag public health emergency.
Raya hay ginpaeawig ni Biden sa anang pagpungko, kun sa siin minilyon nga mga Amerikano ro nakabaton it libreng COVID testing, bakuna ag treatments.
Gindugang pa ni Aguilar nga nauna eon nga ginpahayag it Office of Management and Budget it White House nga nakataeanang matapos raya sa masunod nga mga binuean ag posibleng hasta eon lang raya sa Mayo 11 ag pagatapuson eon.
Ginpahayag ni Aguilar nga sa makaron ro Amerika ro nagabayad sa mga bakuna kontra COVID-19, nagapabueong ag testing apang sa oras nga matapos eon ro deklarasyon it Public Health Emergency, igasaylo eon ro nasambit nga mga gastos sa mga private insurance ag government health plans.
Sa makaron kon igakumpara ko nagtaliwan nga mga binuean, mas manaba eon sigon ro kaso it COVID-19 sa US sa pihak nga nakakalista pa sanda it masobra sa 500 nga katawo nga adlaw adlaw nga nagakamatay bangud sa nasambit nga sakit.
