KALIBO, Aklan—Padayun ro apela it mga vendors sa Kalibo public market nga indi eon pagtaw-an it extension it lokal nga gobyerno it Kalibo ro mga vendors sa mga talipapa para sa pagbo-oe ag pag-renew it andang mayor’s permit.
Suno kay Rosalia Tampos, presidente it fish vendors association sa tindahan nga may ginpadaea eon sanda nga mga petition letters kay mayor Juris Sucro nga indi pagtaw-an it permit ro mga talipapa vendors nga makabig nga hugut nanda nga kakompetensiya sa andang pagnegosyo.
Kaeabanan sigon sa mga raya hay illegal nga nagabaligya.
Ginpahayag dugang nga bukon it patas ro nagakatabu bangud nga ro tanan nga mga vendors sa tindahan hay required nga magbo-oe it kompleto nga mga dokumento agud nga makabaligya apang ro mga vendors sa talipapa hay mayor’s permit eamang ro ginapangayo.
Dismayado man sanda bangud nga hasta makaron hay owa pa it aksyon ro andang ginpaabot nga problema eabi eon sa sangguniang bayan it Kalibo.
Tiempo eon suno kana nga duea-on ro mga talipapa nga ginpasugtan eamang kat nagpanaeasa ro covid 19 pandemic.
Sa pihak nga parte, welcome development sigon ro planong pagtukod it bag-ong Kalibo public market agud nga mapa-improve ro presenteng kahimtangan nga nagatau it inconvenience sa parehong vendors ag consumers.
