Matapos ro temporaryong pag-instrikto sa mga aktibidad sa kadagatan nga sakop it Boracay bangud sa mga ginpatigayon nga aktibidad angot sa ASEAN events ag yacht cruise, balik eon sa normal ro operasyon it water activities sa isla.
Base sa sea travel advisory no. 3 nga ginpaguwa it Philippine Coast Guard ukon PCG-Aklan, umpisa alas 7:00 it agahon hasta alas 12:00 it udtro adlaw ko Marso 27 hay ginpundo ro tanan nga operasyon it watersports kaibahan ro island hopping, scuba diving, helmet diving, paraw sailing, ag mga aktibidad sa front beach sa Station 1 hasta 2.
Ginpatigayon ro mandu sa pakikipag-angot sa Aklan Provincial Government, LGU-Malay, ag Boracay Water Sports Association agud nga masiguro ro eowas nga palibot sa kadagatan para sa yacht cruise.
Ginmanduan ro tanan nga mga saeakyang pangdagat nga ipabilin ro eowas nga distansya halin sa lugar it aktibidad agud nga malikawan ro pag-gutok ag peligro sa pag-eayag sa gina-agyan nga ruta it yacht cruise.
Sakop it mga restriksyon ro mga katubi-an sa palibot it Boracay.
Tuyo it nasambit nga tikang nga suportahan ro pag-host it ika-44 nga pueong it ASEAN Capital Markets Forum (ACMF) Chairs ag mga aktibidad it mga delegado it ASEAN Summit 2026, partikular ro ginpatigayon nga yacht cruise.
Matapos ro nasambit nga event, uman nga naga-enjoy makaron ro mga turista sa nagkaeain-eain nga water sports activities partikular ro snorkeling, parasailing, ag iba pa nga nagapangunang atraksyon sa lugar.
