KALIBO, Aklan — Nagsurender ro sambilog sa nasentensiyahan it murder nga nakahilway sa Good Conduct Time Allowance ukon GCTA law sa sangka police station sa Western Visayas.
Raya ro ginkumpirma ni P/Lt. Col. Jo-em Malong, tagapaghambae it Police Regional Office ukon PRO-6.
Apang nagpamalibad anay si Malong nga pangaeanan ro convict nga nakahilway sa idaeum it GCTA law nga nagsurender eon.
Padayun sigon sanda nga nakikipag-angot sa national headquarters agud nga masayuran ro guidelines ukon mga dapat nga himuon.
Sa makaron suno kana hay gin-hold ro nagsurender sa sangka police station ag ginpaidaeum sa profiling.
Angot kara, nagpanawagan si Malong sa iba pang nakahilway sa idaeum it GCTA sa Western Visayas nga magsurender eon bangud nga may una sigon nga dead or alive nga pahayag si Pangueeong Rodrigo Duterte kontra sa mga nakahilway nga convicts.
Laygay kara sa mga gusto nga magsurender nga makipag-angot eamang sa pinakamaeapit nga police stations ukon military detachments.
Ro mga pulis ag soldado sigon ro makikipag-angot sa DOJ ag sa Bureau of Corrections ukon Bucor.
