KALIBO, Aklan—Naga-abot eon sa 11 nga banwa sa Aklan ro gin-upgrade sa ‘pink zone’ angot sa African Swine Fever ukon ASF Zoning.
Suno kay Dr. Ivy Lachica it Office of the Provincial Veterinarian ukon OPVET Aklan nga raya hay base sa deklarasyon it Bureau of Animal Industry it Department of Agriculture as of October 31, 2024.
Ro 11 nga mga banwa nga na-upgrade eon sa pink zone ukon buffer halin sa red zone ukon infected hay ro Banga, Balete, Batan, Madalag, New Washington, Malinao, Makato, Nabas, Malay, Altavas ag Numancia.
Ginpaathag ni Dr. Lachica nga kon ro sangka lugar hay gindeklara nga pink zone, raya hay nagakahueugan nga pwede eon nga maka-umpisa it andang sentinelling program ag pwede eon madeklara locally nga ASF free.
Nagatau sigon kara ro DA it mga urok agud nga ma-ekspermentuhan kon may naga-eksister pa nga virus sa lugar.
Mag-eowas kara, pwede eon man maka apply para sa recognition of active surveillance nga sambilog sa mga requirement sa pagbiyahe it baboy paguwa sa probinsya.
Sa pihak nga parte, ro mga banwa nga nagapabilin sa red zone hay ro Ibajay, Tangalan, Libacao, Lezo , Kalibo, ag Buruanga.
Sa red zone, hugut ro mga patakaran kontra sa movement it buhi nga baboy, karne it baboy ag mga produktong baboy kaibahan ro fresh ag frozen nga karne it baboy ag hilaw nga processed pork products, mag-eowas sa eaha ag de-latang processed pork products, pati man ro mga swine genetic materials agud nga malikawan ro pagkalhit it ASF.
Sa pihak nga parte, owa pa gina engganyo it OPVET ro pag-alaga it maabuan nga baboy bangud nga kaabuan sa mga banwa sa aklan hay sa pink zone pa eamang.
Mas mayad suno kay Dr. Lachica nga hueaton anay it mga hog raisers nga madeklara ro lugar nga yellow zone agud nga makasigurado nga eowas eon ro pag-alaga it baboy.
